വേഷപുരാണം.

വേഷപുരാണം

  

അച്ഛൻ സമർത്ഥനാണ് ---

ഇട്ട ഉടുപ്പുനോക്കി ആളുകളുടെ ഉള്ളുകള്ളി കണ്ടുപിടിക്കും. 

കേട്ടിട്ടില്ലേ, പഴമൊഴി? 

(പഴഞ്ചൊല്ലിൽ പതിരില്ലെന്ന് അച്ഛനുറപ്പാണ്.)

മനുഷ്യനാരാണെന്ന് കുപ്പായം പറയും;*

പുറംചട്ട കണ്ടാലറിയാം പുസ്തകത്തിന്റെ മേന്മ**.

വേഷഭൂഷകളാണു മോനേ സ്വത്വം --- സത്തയും. 

തോർത്തുടുത്തവൻ തൊഴിലാളി;

തൊപ്പിയിട്ടവൻ മുതലാളി.

പച്ചയിട്ടവൻ മേത്തൻ (മ്ലേച്ഛൻ);

ഉച്ചിയിൽ കുടുമയുള്ളവൻ കേമൻ.

നെറ്റിയിൽ തിലകമുള്ളവനെ നമ്പാം --- ചതിക്കില്ല. 

തിലകം നീളത്തിലെങ്കിൽ നീതിമാൻ;

പൊട്ടാണെങ്കിൽ ബുദ്ധിമാൻ (എന്നെപ്പോലെ).

കാവിയിട്ടവൻ യോഗി;

ക്ലാവു പിടിച്ചവൻ ഭോഗി(രോഗിയുമാകാം).

കുരിശു കേറ്റിയവനോ, 

അവൻ നമുക്ക് കുരിശാകും. 

കീശയിൽ പേന ചാർത്തിയവൻ പ്രസംഗിക്കും; 

ജുബ്ബമേൽ സഞ്ചി തൂക്കിയവനെഴുതും. 

കുളിക്കാതെ പൊടിപിടിച്ചു നടക്കുന്നവൻ ആക്റ്റിവിസ്റ്റ്; 

മുടിയും താടിയും വെട്ടാതെ നീട്ടുന്നവൻ ജങ്കി --- യൂസ്‌ലസ്;  

അത് (എന്നെപ്പോലെ) വെട്ടിയൊതുക്കുന്നവൻ രാജയോഗിയും.

ജീൻസിട്ട പെണ്ണ് പിഴയായിരിക്കും;

കയ്യില്ലാ ബ്ലൗസുമുണ്ടെങ്കിൽ അതുറപ്പാക്കാം.

ഏഴുവാര സാരിചുറ്റിയവൾ കുലസ്ത്രീ; 

മുഖത്ത് മൂടിയിട്ടവൾ അടിമ. 

കോട്ടും സൂട്ടുമിട്ടവൻ എന്നെപ്പോലെ മാന്യനായിരിക്കും.

അകത്തുള്ള വിഷം കാണാതിരിക്കാൻ 

പുറത്തുള്ള വേഷപ്പൊലിമ ധാരാളം. 

തൊലിപ്പുറത്താണ് സൗന്ദര്യം***.

നാട്ടുകാരായ പൊട്ടന്മാർ അതേ കാണൂ;

അവർക്കതു മതി. 

മറ്റെന്തായാലും മ്യോനേ ഇതു നീ മറക്കല്ലേ:

വേഷഭൂഷകളിലാണ് സ്വത്വം --- സത്തയും;

അതാണ് സത്യവും. 

-------------------------------

 * Vestis virum facit  - Erasmus; 

   The apparel proclaims the man - Shakespeare.

** A book is judged by its cover - Mark Twain  

*** Beauty is skin-deep - Thomas Overbury